بلوچستان ءَ پاکستان ءِ جوھری سلاھانی چکاسگ ءِ بگیری ءَ ماں یورپ ءَ زھرشانی

عکس: بی این ایم / ایف بی ایم 

بلوچستان ءِ تہا پاکستان ءِ جوھری سلاھانی چکاسگ ءِ بگیری ءَ یورپ ءِ ملک جرمنی ، نیدر لینڈزءُ لند ن ءَ زھرشانی کنگ بوتگ۔

اے زہر شانی 28 مئی ءَ بگر داں 30 مئی ءَ جتائیں جتائیں روچاں بلوچ آجوئی لوٹوکیں گل بلوچ نیشنل موونٹ(بی این ایم )ءُ فری بلوچستان موومنٹ( ایف بی ایم) ءِ نیمگ ءَ جم دارگ بوتگاں۔

 

یاد بہ بیت  28 مئی 1998 پاکستان ءَ ماں بلوچستان ءِ دمگ چاغی ءَ کوہ راسکو ہ ءَ جوھریبم چکاستگ ۔کہ چریشی ءَ پد پاکستان ماں دنیا ءَ یک جوہری طاقتے جوڑ بوتگ بلے بلوچستان ءِ ہمے دمگ روچ مروچی جوہری تابکاری ءِ آماچ انت ۔ھلک ءِ مردم بازیں بیماری گوں چیرءُ سرانت۔بازینے ہمے بیماریاں چہ مرتگ، زمین پہ کشت ءُ کشار ءَ زبہر بوت،زالبولانی لاپ ءِ زھگ ام جوہری تابکاری ءِ سوب ءَ ایب نارمل ودی بوہگ ءَ انت ءُ بازینے  شکم ءَ مرتگ۔

بی این ایم ءِ جارکش ءِ گشگ انت کہ ماں نیدرلینڈز ءَ  بلوچ راجی زْرمبشت ( بی این  ایم ) ءَ ماں بلوچستان ءَ پاکستان ءِ جوھری سلاھانی چکاسانی بگیری ءَ  زھرشانی کرتگ ءُ روانکے کش اتگ۔

روانک ءِ بھرزیروکاں کاگد ءُ جر نبشت گون اَت کہ آیانی سر ءَ پاکستان ءِ جوھری سلاھانی چکاس ، بلوچ ءِ چکچینی ءُ 28 مئی 1998 ءَ چاگے ءَ پاکستانی جوھری تْراکانی بگیری ءَ اوگام نبشتگ اَت۔

گوں زھرشانی کنوکاں گپ جنان بی این ایم ءِ باسک ڈاکٹر لتیپ ءَ گْوشتگ 28 مئی پہ بلوچستان ءُ بلوچ راج ءَ سیاھیں روچے، چہ پاکستان ءِ نیمگ ءَ چاگے ءَ بیتگیں جوھری چکاس بلوچ چکچینی  ءِ دْرچے ، بلوچستان ءَ جوھری چکاساں نا ایوک ءَ اگواز ( ماحولیات ) بلکیں مردمانی جانْدراھی ھم سانمند بیتگ اَنت۔دمگ ءَ شیمک ، پوست ، پپ ءُ جگرانی نادْراھی ، ٹائیپائڈ ءُ دگہ نادْراھی تالان بیتگ اَنت۔ 

آئی ءَ گْوشتگ مئے زھرشانی ءِ من بلوچستان ءَ جوھری چکاسانی تاواناں میان استمانی تک ءَ سھرا کنگ اِنت۔

آئی ءِ گْوشگ اَت کہ پاکستان ءَ دگہ ڈیھ ھم جوھری توان جوڑ بیگ  ءَ کمک کرتگ ءُ جھان ءِ رستگاری ترس ءِ دیمپان کرتگ۔

بلوچ راجی زْرمبشت ( بی این ایم ) ءِ باسک آلیہ ءَ گْوشتگ جوھری تْراکانی پد ءَ ودی بیوکیں تابکاری ءُ زمین ءِ چیر ءِ لیگارانی برپشت ءَ کشت ءُ کشار نہ بیگ ءِ وڑ ءَ اِنت۔پاکستان ءَ چہ بندات ءَ بلوچ چکچینی ءِ شوندات زرتگ ءُ جزان اِنت۔میان استمان پاکستان ءِ بگیری ءَ ترند ءُ پاداریں گامگیج چست بہ کنت داں دگہ ڈیھے چوشیں ترسناکیں چکاس کنگ ءِ ھمت مہ کنت۔

ماھرہ ءَ گوں زھرشانی ءَ ھوار بیتگیں مردماں گپ جنان ءَ گْوشتگ پاکستان ءَ چاگے ءَ جوھری تْراک کرتگ ءُ وت ءَ جھان ءِ دیم ءَ توانمند پیش داشتگ بلے گوں ھمے کار ءَ چاگے ءِ نندوک تاوان  داتگ اَنت ، اگوازی لیگار ( ماحولیاتی آلودگی) ءُ تابکاریاں ودی بیوکیں نادراھیانی پد ءَ آ اود ءِ نندوکاں لڈ اتگ۔

زھرہ ءَ گْوشتگ بلوچ راج پاکستانی مھترھند ءِ دست ءَ گْوستگیں بازیں دھکاں زوراکی ءِ آماچ اِنت۔ چاگے ءَ جوھری تْراکانی پد ءَ آنگْور ءِ نندوک سک باز تاوانبار بیتگ اَنت۔ آ اود ءَ بیوکیں چکانی تہ ءَ شیمک ءُ دست ءُ پادانی منڈ ءُ لنگ بیگ باز اِنت۔

آئی ءَ گْوشتگ پاکستان چہ ھچ چیز ءَ نہ ترس ایت پرچا کہ گوں بلوچستان ءَ ھرچی بہ کنت آ بھ جست گرگ نہ بیت ، اے گپ پہ جھان ءَ جستے ودی کنت۔

باست ءَ گْوشتگ چاگے ءُ بلوچستان ءِ دگہ ھنداں پاکستان ءِ جوھری سلاھانی چکاس ءِ سر ءَ میان استمان ءِ بے تواری ءُ کنٹ مارشتی وتی تانسر ءَ اِنت۔بلوچستان پاکستان ءَ چکاسجاھے جوڑ کرتگ بلوچستان ءَ مروچی ھم جوھری سلاہ ءُ جوھری موشکانی چکاس بیت ، پاکستان ءِ جوھری سلاہ جوڑ کنگ ءِ ھلاھوش پہ جھان ءِ ایمنی ءَ ترسے جوڑ بیت کنت۔ 

ہمے وڑابی این ایم ءِ نیمگ ءَ  چہ  ماں لندن ءَ ام جوھری سلاھانی بگیری ءَ زھرشانی کنگ بوتگ۔ 

بی این ایم ئِ جارکش ءِ گشگ انت کہ ماں کہ بلوچ راجی زْرمبشت ( بی این  ایم ) ءِ برتانیا تک ءَ 28 مئی 1998 ءَ ماں بلوچستان ءَ پاکستان ءِ جوھری سلاھانی چکاس ایرجتگ ءُ ماں لندن ءِ ٹریپلگر اسکوائر ءَ زھرشانی کرتگ۔بلوچ راج اے روچ ءَ سیاھیں روچ ءِ بستار ءَ دار ایت۔

زھرشانی ءَ بی این ایم ءِ باسک ءُ جھگیرانی پجیگ ءَ بلوچ ، سندی ءُ مردمی اگبالانی کارکنانی پجیگ ءَ دگہ گلانی باسکاں بھر زرتگ۔زھرشانی ءَ جتائیں راجاں سیادی داروکیں اھوالکار ءُ باسک ھم ھوار بیتگ اَنت۔

زھرشانی ءِ میان ءَ بی این ایم ءِ راھشون ءُ باسکاں بلوچستان ءَ پاکستان ءِ جوھری چکاس گوں ترندی ءَ ایر جتگ اَنت۔ آئی ءَ چہ میان استمان ءَ لوٹ کرتگ کہ آ پاکستان ءَ چہ آئی ءِ بیم دئیں کارروائیانی جست ءَ بہ گر اَنت ءُ بلوچ راج ءِ برجاھیں چکچینی ءِ دارگ ءَ دزمانجنی بہ کن اَنت۔

ورلڈ سندی کانگریس ءِ راھشون ڈاکٹر لکو لوھانہ ءَ درشانت ، پاکستان یکتائیں ڈیھے کہ آئی ءَ بلوچستان ءِ مردمانی واھگ نہ بیگ ءَ پد ھم جوھری سلاہ چکاس اتگ ءُ جھان بیم داتگ ، ءُ نی ھمیشی ءِ جشن ءَ دارگ ءَ اِنت۔پہ بلوچستان ءَ اے روچ سیاھیں روچے۔

بی این ا یم ءِ کستریں کمک کارگشاد ھسن دوست ءَ میان استمان زور دات کہ آ وتی توار ءَ چسے بہ کنت ءُ بلوچ سرزمین ءِ سر ءَ بیوکیں جوھری چکاسانی پاکستان ءَ جست بہ کنت۔آئی ءَ اے گپ ءِ سر ءَ زور دات،  اے میارے کہ پاکستان ءَ کرتگ ایشی ءِ سر ءَ پاکستان جھانی مزدانکی آمیدگس ءَ پیش کنگ بہ بیت ، اے کار ءِ پد ءَ بلوچستان ءِ مردم ءُ اگواز ( ماحولیات ) ءِ سر ءَ شیمک ءُ دگہ تباہ کنیں سان کپتگ اَنت۔ 

بلوچ استمان گل ( بی آر پی ) ءِ جھگیر منسور ءَ جوھر چکاس ایرجت اَنت ءُ گْوشت پاکستان بلوچ میتگ ءُ بازارانی تباہ کنگ ءَ بلوچ سرزمین ءُ آئی ءِ مڈیاں کارمرد کنگ ءَ اِنت۔

نسار ءَ گوادر ءِ ٹٹ کنگ  ایر جت ءُ میان استمان ءِ سر ءَ زور دات کہ آ بلوچستان ءِ سر ءَ پاکستان ءِ زورگری ءِ بگیری ءَ چست بہ بیت۔

مسلم دیگ ءَ وتی گْوشتانک ءِ تہ ءَ جوھری سلاھانی دیرمانیں سانانی سر ءَ گپ جت ، آئی ءَ جاپان ءِ نام گپت کہ دیمروئی کرتگیں ڈیھے بیتگ بلے دھکانی گْوزگ ءَ پد ھم گوں ہیروشیما ءُ ناگاساکی ءِ زمین ءِ سنٹی ءَ پیڑاتگ۔آئی ءَ دلگوش گْور کنائینت ، بلوچستان زیردستیں سرڈگارے کہ آئی ءِ گْور ءَ جاپان ءِ رنگیں آسراتی نیست۔ جوھری چکاساں یکشلیں تاوان دئیں سانانی پجیگ ءَ زمین  ، مردم ، دلوت ءُ درچک ءُ دار تباہ کرتگ اَنت۔ 

ھورشید ءَ ھمے رد ءَ گْوشت ، بلوچستان سرجم ءَ رسانکی چیپاں موری ءِ تہ ءَ اِنت۔ آئی ءَ سھرا کرت کہ رسانک ءُ پولکارانی سر ءَ پاکستان ءِ پابندیانی پد ءَ جھان ءَ دمگ ءِ جیڑھانی جھلانکی ءُ پھناتانی بارہ ءَ سرپدی نہ رسگ ءَ اِنت۔ 

سلیم ءَ  پاکستان ءِ دست ءَ بلوچ سیاسی کارکن، مردمی اگبالانی کارکن ، اھوالکار ءُ دگہ شھرمنندانی مزنیں کچے ءَ کشت ءُ کوش ءِ سر ءَ گپ جت ، آئی ءَ اے گپ ءِ سر ءَ زور دات کہ 28 مئی 1998 ءَ جوھری چکاساں زمین  ، آپ ءُ گوات گیشتر لیگار کرتگ اَنت ، چہ ایشی ءَ پہ بومیاں دیرمانیں جاندْراھی جیڑہ ودی بیتگ۔

ماہ گنج ءَ چہ راج ءَ دزبندی کرت ، آ ناں ایوک ءَ پہ وتی گھتریں باندات ءَ کوشست بہ کنت بلکیں پہ وتی آجوئی ءَ ھم جھد بہ کنت۔

 زھرشانی گوں میان استمانی دزمانجنی ءِ ھم پتیں لوٹ ءَ آسر بوت۔ بلوچ راجی زْرمبشت ( بی این ایم ) ءَ لوٹ کرت کہ دودمانداریں جھان بلوچستان ءَ برجاھیں زوراکیاں بہ من ایت ءُ پاکستان ءِ زورگریں شونداتانی بگیری ءَ گیش اتگیں کارروائی بہ کنت۔ بی این ایم میان استمان ءَ زور دنت کہ آ بلوچ راج ءِ مزدانک ، آزادی ءُ وتی گلزمین ءِ پھریزگ ءِ جھد ءِ پلہ مرزی بہ کنت۔ 

جرمنی ءَ ام بی این ایم ءَ بلوچستان ءَ پاکستان ءِ جوھری چکاسانی بگیری ءَ زھر شانی کرتگ۔  

بی این ایم ءِ جار کش ءِ گشگ ءِ پدءَ   بی این ایم  ءَ بلوچستان ءَ پاکستان ءِ جوھری چکاسانی بگیری ءَ جرمنی ءِ شھر گوٹنگن ءَ زھرشانی کرتگ۔اے روچ ، بلوچستان ءَ سیاھیں روچ ءِ بستار ءَ دارگ بیت ءُ 1998 ءَ بلوچستان ءِ ھند چاگے ءَ کنگ بیتگیں جوھری تْراک یاد کنگ بہ اَنت۔زھرشانی کنوکاں اے تْراکانی دیرمانیں سان سھرا کرتگ اَنت ، کہ ایشانی پد ءَ دمگ ءَ مزنیں کچے ءَ جاندْراھی ءُ اگوازی تک ءَ بیرانی بیتگ۔

بی این ایم جرمنی تک ءِ کماش شرھشن ءَ بلوچستان ءِ زورگری ءُ لشکری لگتمالی ءِ سر ءَ دلگوش پرینان ءَ گْوشتگ ، 28 مئی 1998 ءَ پاکستان ءَ بلوچستان ءَ نام گپتیں چکاس کرت اَنت بلے اے مئے بگیری ءَ ارش بیتگ اَنت پرچا کہ پاکستان ءَ 1948 ءَ بلوچستان زور گپتگ۔اے چکاس بلوچستان ءَ مہ بوتین اَنت بلکیں پنجاپ ءَ بوتین اَنت۔بلوچستان ءَ نوک آبادی سرپد بہ اَنت ءُ پاکستان ایشی ءَ پہ سلاھانی چکاسگ ءَ کارمرد کنگ ءَ اِنت، کہ چہ آیاں چین ءِ سلاہ ھم ھوار اَنت۔ما اے زورگر ءُ لگتمالی ءِ بگیری ءَ اوشتاتگ ایں۔ بلوچ راج اے کارروائیاں نہ من ایت ءُ وتی سرڈگار ءِ سر ءَ ھرچ وڑیں زورگری ءُ سرمایہ داری ءِ بگیری ءَ گھگیری کنت۔

بی این ایم جرمنی تک ءِ کمک کماش سپیہ منزور ءَ پاکستان ءِ جوھری چکاس ایر جتگ اَنت ءُ میان استمانی مزدانک ، یکجھتی ءِ سر ءَ زور داتگ ءُ گْوشتگ مروچی ما بلوچستان ءَ پاکستان ءِ جوھری چکاسانی ایر جنگ ءَ اد ءَ مچ ایں۔کہ آیاں وتی پشت ءَ جیڑہ ءُ بیرانی اشتگ کہ داں مروچی مئے مردماں سانمند کنگ ءَ اَنت۔اے چکاس میان استمانی جوھری مسامانی پدریں بگیری اَت اَنت، کہ آ ناں ایوک ءَ بلوچستان بلکیں پہ میان استمانی رستگاری ( سلامتی ) ءَ ھم ترس ودی کنگ ءَ اَت اَنت۔

بی این ایم جرمنی ءِ کارگشاد ابدل جبار ءَ جوھری چکاسانی مردم ءُ اگواز ءِ سر ءَ بدیں سانانی بارہ ءَ الکاپی ءَ گپ جتگ ءُ گْوشتگ، 28 مئی 1998 ءَ پاکستان ءِ جوھری چکاسانی پد ءَ ترندیں رنگے ءَ اگواز لیگار (آلودہ) بیتگ ، تابکاری ءِ پد ءَ شیمک ، چکانی مرگانی تہ ءَ گیشی ءُ مزنیں کچے ءَ اگوازی تاوان بیتگ اَنت۔اے سانانی آزادیں  رنگے ءَ پٹ ءُ پول ءَ نہ ھلگ ءَ اَنت۔

آئی ءَ گْوشتگ بلوچستان چہ پاکستانی سرکار ءِ نیمگ ءَ مردمی اگبالانی مزنیں بگیریانی آماچ اِنت ، چہ ایشاں زوربیگواھی، درآمیدگسی کوش ءُ ناپتیں درشانانی ( اختلاف رائے ) گٹگیر کنگ ھوار اَنت۔

بی این ایم جرمنی تک ءِ کمک کارگشاد شلی ءَ گْوشتگ سانمندیں چکاں مزدانک ءُ مدد پکار اِنت۔

آئی ءَ گْوشتگ بلوچستان ءَ 1998 ءِ جوھری چکاسانی پد ءَ جینیاتی نادراھی ءِ آماچ بیتگیں چکاں پہ مزدانک ءُ پراوستیں باندات ءَ زیت کمک پکار اِنت۔ 

آئی ءَ زور داتگ میان استمان بلوچستان ءَ بیوکیں ٹوھیں جنگی میاراں بہ من ایت ءُ پاکستان ءِ جوھری سلاھانی سر ءَ پابندی جنگ ءِ لوٹ ءِ پد ءَ گامگیج بہ زیر ایت۔

بی این ایم جرمنی تک ءِ پیسرگیں کماش ازگر ءَ گْوشتگ میان استمانی تک ءَ بلوچستان ءِ جیڑہ منگ لوٹ اَنت۔ 1998 ءَ پاکستان ءَ چاگے ءَ جوھری چکاس کرت ، آ اود ءِ نندوکیں مردم اش سھی نہ کرت اَنت ءُ چہ گساں در کرت اَنت۔ اے زوریں بے گسی ءَ سدانی کچ ءَ مردم چہ لوگ ءُ دواراں زبھر بوت۔میان استمان اے نامزدانکی ءَ بہ من ایت ءُ ایشی ءَ پر بہ کنت۔

 

بی این ایم ءِ باسک آسپ ءَ  اے چکاس  ایر جتگ اَنت ءُ میان استمانی تک ءَ کارروائی ءِ لوٹ کرتگ۔ 

آئی ءَ گْوشتگ 28 مئی 1998 ءَ چاگے ، بلوچستان ءَ پاکستان ءِ جوھری چکاسانی روچ بلوچستان ءِ گْوستانک ءَ پرس ءِ روچ اِنت۔اے چکاس ، کہ ’ اسلای بم‘ گْوشگ بیت ، ایشی ءِ تباہ کنیں آسر در کپت اَنت، چوش کہ تابکاری ءِ سان ءُ کشندھیں نادْراھی۔

آئی ءَ زور داتگ ءُ گْوشتگ میان استمان پہ پاکستان ءِ جوھری سلاھانی کمی ءَ مالی کمک ءِ ڈک ءَ بہ جنت۔

سمو داد ءَ گْوشتگ بلوچستان ءِ جاورانی گھتر کنگ ءَ گر ءُ دار ءُ کارورائی لوٹ ایت۔

آئی ءَ گْوشتگ مارا گپ جنگی اِنت۔ ما اے گپ ءَ الم بہ کن ایں کہ ھرچی بیتگ کسے ایشی ءِ زمہ واری ءَ بہ زیر ایت۔پہ سرکار ءُ مزنیں گلاں اے المی اِنت کہ آ تاوان ءِ پر کنگ ، اگواز ءِ سرسبزی ءُ سانمند بیتگیں مردمانی کمک ءِ سر ءَ دلگوش بہ کن اَنت۔

شاری ءَ گپ جنان ءَ چہ جوھری چکاساں ودی بیوکیں جیڑہ ءُ دمگ ءِ گھبود ءِ ڈالچار کنگ ءِ نیمگ ءَ دلگوش پرینتگ ، آئی ءَ گْوشتگ بلوچستان ءَ مئے مردمانی درد چد ءُ گیشتر ڈالچار بیت نہ کن اَنت۔

بلوچ راجی زْرمبشت ( بی این ایم ) ءِ باسک ایمان ءُ بالاچ ءَ بلوچستان ءَ جوھری چکاس ءُزوراکی ءِ آسر کنگ ءِ لوٹ کنان ءَ گْوشتگ چہ 28 مئی 1998 ءَ مئے مردم نادْراھی ءُ اگوازی تاوانانی آماچ اَنت۔ ما اے چکاسانی آسر کنگ ءِ لوٹ ءَ کن ایں۔مئے سرکار ءَ اے ترسناکیں چکاس دارگ لوٹ اَنت۔مئے مردم ابید چہ جوھری سلاھاں پر ایمن ءُ پھاز اتگیں بانداتے کرز اَنت۔

اے زھرشانی ءَ ماں گانسیلیسل ءَ جوھری بم ءِ بگیری ءَ کسمانکے ھم پیش کنگ بیتگ، آئی ءِ تہ ءَ انچیں جھانے ءِ ندارگ پیش دارگ بیتگ کہ مردم گین پر کرت نہ کن اَنت۔اے کسمانک ءَ جوھری شوربندیاں ھواریں سرکاری کارمندانی سروگان ءُ لشکری سروگانانی بدیں کردار ءِ سر ءَ ایراد گرگ بیتگ۔

بلوچ راجی زْرمبشت ( بی این ایم ) جوھری تابکاری ءِ سانانی سر ءَ پٹ ءُ پول ءَ آزادیں میان استمانی پٹ ءُ پولی کاربولک ( ٹیم ) ءِ لوٹ ءَ کنت۔ پاکستان ماں بلوچستان ءَ آئی ءِ بے پرواھیں چکاسنی سر ءَ جست کنگ ءُ ڈنڈ دیگ بہ بیت، کہ آئی ءَ چاگی ءِ نندوکیں مردم یکشل ءَ تاوان داتگ اَنت۔ اے چکاسانی تباہ کنیں سان ءِ بارہ مردم سھی کنگ بہ بہ اَنت ءُ پاکستان ءِ چہ جوھری سلاھاں پاک کنگ ءَ ترندیں گامگیج زیرگ بہ بیت۔

بالاچ ءَ بلوچستان ءِ شانداریں دود ءِ ستا شانی ءَ زھرشانی ءِ بندات گوں بینجو ءَ چہ راجی سوت کرت۔

ہمے وڑا فری بلوچستان موومنٹ ( ایف بی ایم) ءَ ماں بلوچستان ءَ پاکستانی جوہری سلاھانی چکاسگ ءِ بگیری ءَ28 مئی ءَ لندن ءَ برتانیا ءِ سروزیرءِ لوگ ءِ دیما زھر شانی کرتگ۔ 

زھر شانی ءِ وھد ءَ پہ مہلوک ءِ سرپدی ءِ ھاترءَ پنتاک ام بہر کرتگ۔

زھرشانی کنوکاں بینرزءُ پلے کارڈدستہ زرتگ اتاں تاکیں مہلوک ءَ سرپدی دئیگ بہ بیت۔ آہاں نعرہ ام جتگ۔

زھرشانی کنوکاں برتانیا ءِ مہلوک ءَ گوں دزبندی کرتگ کہ آ  1876 ءِ  معاہدہ ءِ سرا مھکمی  بہ اوشتیت ءُ بلوچستان ءِ آجوئی ءِ پلہ مرزی ءَ بکن ۔ءُ وتی سرکار ءَ کڈن بہ کنت کہ پاکستان ءُ ایران ءِ کمک ءَ مکن انت۔

یاد بہ بیت کہ 1876معاہدہ ءِ ردئَ برتانیامیان استمانی راہبندانی ھساب ءَ پابند انت کہ آبلوچستان ءِ سرا ہر وڑیں ارش ئِ بگیری ءَ آئی ءِ سیاسی ، لشکری ، زری ءُ اخلاقی کمک ءَ بہ کنت۔

 

زھرشانی کنوکاں تپاکیں راجانی گل ءَ  گوں  دزبندی کرتگ کہ آآئی اے ای ءَ چہ چاغی ءِ معائنہ بکنائیت ءُ رپورٹ شنگ بکنت۔ءُ اوداانسان ءُ دگہ ساہ دارانی جانانی تاوان دئیگ ءَ پاکستان ءَ ذمہ وار جوڑ بکنت۔

اے زھر شانی نیم روچ  ءِ 2 بج ءَ بندات بوتگ ءُ بیگا ہ ءِ 5 بج ءَ ھلاس بوت۔