 |
| میر عمر میر | فوٹو : ریگزار |
مھرنگ ءِ نام ءَ
میر عمر میر
روپیت دلاں چم سنگر بنت
لبزانی شورہ برانز گر اَنت
زمزیل توار ءَ مَٹین اَنت
چوڈیک وتی آواز ءَ چن اَنت
ءُشہر شِپاد ءَ درکیت اِنت
اے ارس کتاریں چمانی
ارمان سپاھی جوڈ کن اَنت
من ہردیں بلوچستان گشاں
مھرنگ زبان ءَ درکئیت اِنت
کئے چاریت اے چمانی تہا
ھنکین چراگاں شُوہاز اَنت
رُشنائی وتی نام ءِ دیم ءَ
مھرنگ نبشتہ کنت ءُ گشیت
من کمیں گِشتر رژنا باں
اے راہ ءِ تمامیں درچکانی
سرشاہاں کپوت الہان کن اَنت
آزمان گَل ءَ نازینکے بیت
ءُ سوت زمین ءَ گوانک جن اَنت
من ہردیں بلوچستان گشاں
مھرنگ زبان ءَ درکئیت اِنت
بیابیاکہ ھمے آواز ءِ تہا
چنت باریں دل ءِ آواز پُرشیت
اے پیریں پتانی دست ءِ اسا
بورینتہ رمیزاں گار کتگ
کئے زانت کئی ساہ ءِ پجّی ءَ
کئے ساہ کَشّیت ءُ زندگ بیت
باریں آ تِلاھیں لال منی
اے چماں گوں چوں گندگ بیت
من ہردیں بلوچستان گشاں
مھرنگ زبان ءَ درکئیت اِنت
٭٭٭
Post a Comment