زندگی اپریل فول ے | ساجد نور

فوٹو: ریگزار

زندگی اپریل فول ے

نمدی

ساجد نور

مھروانیں جاویدسعید امیت اِنت تو جوڑ  ءُ وش ئے

سک باز روچ اِنت کہ گون تو ھال اھوال نہ بوتگ سک باز سال اِنت کہ ترا من دیم پہ دیم نہ دیستگ ،انوں کہ ترا من اے نمدی ءَ نبشتہ کنگاؤں سھب ءِ 5:44 منٹ اِنت ۔

مرچاں منی چم اوں نِزور اَنت موبائل ءِ کارمرز کنگ ءِ وہدا اگہ چشمک ءَ چم ءَ مہ کناں گُڈاں سک بے وار باں ڈاکٹر ءَ منا گشت کہ اے چشمک ءَ بس پہ موبائل ءِ کارمرز کنگ ءِ وہدا چم ءَ بکن بلئے نوں منا انچو گُمان بوھگا اِنت کہ اے چشمک منا بیست ءُ چار کلاک چم ءَ کنگ کپیت۔

انوں کہ من ترا اے نمدی ءَ نبشتہ کنگاؤں من چشمک سے،چار بَرا ساپ کتگ بلئے پورا انگہ ایشی ءِ کانچانی سرا  مُج یے ءَ مانشانتگ،بلئے چو من سرپداں کہ اے مُج چشمک ءِ نہ اِنت بلکن منی چمانی نہ توانی ءِ مُج اِنت منی چمانی پیری ءِ مُج اِنت کہ دیما  مانشانتگ ئے۔

مرچی سال 2024 ءِ چارومی ماہ بزاں اپریل ءِ چار تاریخ اِنت، آ زمانگ ءَ کہ ما کسان اَتیں اپریل ءِ ماہ ءِ یک تاریخ ءَ ما دروگ ءِ بندگ ءِ روچ سرپد بوتگیں  ءُ ھمک یکم اپریل ءَ ما پہ مسکراہ سنگتاں گون الم دروگے دروگے بستگ اَت،ھمے یکیں روچ ءِ دروگ ءِ بندگ ءَ پد ما  سک ھجالت  ھم بوتگ اتیں،بژنیگ  ھم بوتگ اتیں بلئے بیا کہ نوں اے وڑ نہ اِنت  نوں ھمے دروگ ءَ ما پہ مڑاہ بندیں، اے دروگ ءِ اولی شکار مئے جند بیت اے دروگ ءِ بندات ءَ ما پیسرا چہ وتا کنیں،پیسر گون وت دروگ بندیں رندا گون جھان ءَ ھمے دروگ بندگ ءِ کار ءَ کنیں،گون وتی زمین ءَ گون وتی تیاب ءَ ،گون وتی کوھاں،گون وتی کور ءُ کیلگ آں دروگ بندگ ءِ کار ءَ کنیں۔

یکم اپریل ءَ چہ منا کسہ یے یات اَتک،اے ھما زمانگ ءِ گپ اِنت کہ من نہمی جماعت ءَ وانگ ءَ اتاں،یکم اپریل ءِ روچ اَت،واجہ یونس ارمان کلاس ءِ تھا سیائیں بورڈ ءِ دیما اْشتاتگ اَت مارا وانینگ ءَ اَت ،ھدامرزی عطا چپراسی کلاس روم ءِ تھا پُترت ،یونس ارمان ءَ را گُشت یے کہ ساجد ءَ ڈن ءَ لہتیں مردم لوٹگا اِنت، من کلاس ءَ چہ ڈن دراَتکاں داں چاراں منی ھمساھگ حلیم سربازی ءُ روف یاسین اُوشتاتگاں،من گُشت ھیر اِنت ،گشت ئے۔۔ اِنا ھیر نہ اِنت ،تئی کماش جیٹی ءَ کپتگ بیران بُوتگ۔۔۔۔۔اے ھال ءِ ہش کنگا چہ مُردنی  من کمے ھم نہ گریت من تچان تچان ءَ جیٹی ءَ شُتاں،من وتی پت ءِ ھمکار گل محمد نامیں ھمالے ءَ چہ جُست کت منی پت۔۔۔۔آئی ءَ دست کھارا پانی ءِ نیمگا ٹال کُت من اشتاپ اشتاپ ءَ ھمودا شُتاں داں چاراں منی پت یکدار  ءِ درکنگ ءِ واستا  تَرم آں ریزگ ءَ ایر کنگا اِنت۔۔۔۔۔ھمدا من گریت ،سک گریت ،پت اتک منا بگل ءَ کُت ئے کہ ترا چے بوتگ ۔۔۔۔من ھچ نہ گشت ۔۔۔۔۔بلئے اے اولی بَر اَت کہ من سرپد بوتاں کہ مرچی اپریل فول اِنت، دروگے اوں یک روچے اَست۔۔۔۔

جاوید،زی بیگہ ءَ منی سر کبرستان ءَ کپت،من وتی پت ءِ کبر ءِ سرا اوشتاتاں ،  آئی ءِ گوما سھل ءُ ترانے کت،مات ءِ گلگ سر کتاں ،من پت  ءَ را گُشت دوستین ! گپے زان ئے  آپ ءِ موٹر ھراب اِنت ،پیسرا ہر وہدا تو ساپ کتگ شر کتگ ھمائیں کہ تو ادا اتکگ ءِ من آپ موٹر ساپ نہ کتگ ھمے واستا موٹر نارضا اِنت۔۔۔

کبراں   ہٹ کناں من دیم ءَ روان بوتاں، واجہ اکرم صاحب خان ءِ کبر دیست ،اکرم  ءِ کبر ءِ پُشت ءَ ماما انورصاحب خان  ءِ کبر اَت،روچ دراتکہ ناصر وقار اوں ایمنی ءَ واب اَت۔۔۔ایشاں چہ کمیں آ کَش تِر  روچ برکت ءَ صمد عبداللہ ءِ کبر اَت۔۔۔۔

چاریں نیمگا وتی مردم اَتاں ،من ھیران اَتاں کہ پیسرا گون کئے گپ بکناں،واجہ اکرم ءَ بُگشاں کہ تئی اسپست ءِ کاہ ءِ  گلدستہ   پیرو کاہ والا ءِ کرا اِیر اِنت تو دیریں بَرگایے نہ ئے یا کہ ماما انور ءَ بُگشاں کہ  موسی امیت ءِ دوکان ءَ تئی واستا اِیریں سگریٹ ءِ ڈبی نوں پیر بوتگ بیا بَرئے۔۔۔

 ناصر وقار  ءِ کبر ءِ نزیک  ءَ اتکاں،گشت ۔۔۔۔ یار ناصر،بیا امیتابھ بچن ءِ فلم امر اکبر  انتھونی  ءَ تئی کسانکیں موبائل ءَ مان کناں پدا بچارئے،سک وشیں فلمےشبانہ اعظمی ءُ نیتو سنگھ ءِ بالاد سک جلواہ دیاں گندئے۔۔۔۔پُشت ءَ چہ یکے ءَ  ٹہک دات، من چَک ترینیت داں صمد عبداللہ اِنت۔۔۔

صمدعبداللہ کندگا اَت۔۔درائینت یے ناصر اگہ فلم امر اکبر  انھتونی ءَ بچاریت پدا پران جوڑ بیت ءُ لوگا سر کنگ لوٹیت۔۔۔۔من ھم ٹہک دات۔۔۔۔بلئے منی ٹہک ءِ آواز منی جند ءِ گُوشاں اوں نہ کپت۔۔۔

یار جاوید۔۔۔۔  زندگی اپریل فول یے۔۔۔

              تئی کستر : ساجدنور

٭٭٭