 |
| زالبولانی میان استمانی روچ ءِ درگتءَ ھاران ءِ مراگش | فوٹو : بی ڈبلیو ایف |
ھشت مارچ ءَ زالبولانی میان اُستمانی روچ ءِ درگت ءَ ماں ھاران ءَ بلوچ وومن فورم ءِ نیمگ ءَ یک مراگشے برجم دارگ بوتگ ءُ مزنیں کچے ءَ مھلوک ءَ بہر زرتگ ۔
بلوچ وومن فورم ئِ بُنجاھی جار کش ءِ رد ءَ مراگش ءِ تہ ءَ گُشتانک ، پینل ڈسکشن ، ٹیبلو ، ڈاکیومنٹری،پیپر ریڈنگ ، کتاب میڑہ ، بلوچی ازباب ءُ سوت ھوار بوتگ اَنت ۔
ھاران ءَ زالبولانی روچ ءِ مراگش ءِ تہ ءَ گل ءِ بُنجاھی آرگنائزر ڈاکٹر شلی بلوچ ، بُنجاھی ڈپٹی آرگنائزر حنیفہ بلوچ ھوار بوتگ اَنت ۔
مراگش ءِ بندات چہ راجی سوت ءَ بوت کہ گوہر نور بلوچ ءَ راجی سوت ونت ، ءُ پدا ڈاکٹر سمعیہ بلوچ زالبولانی سرا ریسرچ پیپر ءِ ونت ۔
دیمترا زالبول ءِ کرد ءِ سر ءَ ٹیبلو ءِ چہ زھگانی نیمگ ءَ پیس کنگ بوت کہ ٹیبلو دو بہر ءَ اَت بنداتی بہر ءَ یک چاٹ ءِ پیش دارگ بوت کہ قبضہ گیری ءَ پیسر ءِ زالبول ءِ کرد پیش دارگ بوت آئی تہ ءَ مہناز ، ھانی ، بانڈی ، چاگلی ، مائی بیبو ، گل بی بی ءُ سیمک ءِ کرد پیش کُت ءُ دومی بہر قبضہ گیری ءَ پد زالبول کرد پیش دارگ بوت کہ زالبول انو ریاستی جبر ءِ آماچ اِنت کہ مروچی آئی برات ،پت ءُچک بیگواہ کنگ بوگ ءَ اَنت ءُ مروچی زالبولانی پجار بیگواہ اِنت ۔
گشتانکی بھر ءِ تہ ءَ ڈاکٹر شلی بلوچ ، عطا نصیر بلوچ، ڈاکٹر منیر بلوچ ءُ لاہبہ بلوچ ھوار بوتگ اَنت ۔
دیوان ءَ پینل ڈسکشن ھوار اَت کہ آئی ءِ سرھال "راج دوستی ءِ تہ ءَ زالبول ءِ کرد" اَت کہ آئی ءِ مہمان مسلم شفیع بلوچ ، ایف جے فیضی بلوچ ءُ ڈاکٹر سعمیہ بلوچ بوتگ اَنت ءُ مہماندار اُمیمہ بلوچ اَت ۔
مراگش ءِ تہ سوت ھم ھوار بیتگ ، گوہر نور بلوچ ءُ عامر بلوچ ءَ سوت گوشتگ ، دیمی بہرانی تہ ءَ کتاب میڑے ءِ اڈ دیگ بوتگ کہ آئی تہ ءَ جتائیں سرھالانی سرا کتاب ھوار بوتگ اَنت ءُ حضور بخش بلوچ ءَ بلوچی ازبابانی درنگازی کُتگ ۔
مراگش ءَ تران کنان ءَ جتائیں گشتانکار ءُ مہماناں زالبولانی روچ ءِ سرا گپ کُت ءُ ایش گپ ءِ سرا زور دات کہ زرمبشت ھما وھد ءَ سوبمند بوت کن اَنت کہ آ زرمبشتانی تہ ءَ زالبول بہر زور اَنت ءُ عملی پڑ ءَ وتی کِرد ءَ پیلو کن اَنت ، ءُ بازیں زرمبشتانی درور بی دیگ بوت کہ اودا زالبولاں جنزانی تہ ءَ بہر زرتگ ءُوتی کرد پیلو کتگ ۔
دیمتر ءَ دیوان ءَ اے گپ ءِ سرا زرو دیگ بوت کہ ڈسکورس ءِ ھست ءِ کہ زالبول نزور اِنت ھچ کُت نہ کنت بلئے اے گپ ءَ بہ زاناں کہ ڈسکورس ءِ پچ کنوک بی ریاست اِنت آ زانت کہ زالبول جُنزانی تہ بہر بہ زوریت گُڈا مئے ایردستی ءِ روچ ھلاس بنت۔
٭٭٭
Post a Comment