 |
| ماں جنیوا ءَ بی این ایم ءِ پریس کانفرنس | فوٹو : بی این ایم |
جنیوا: بلوچانی گوں دری راجاں "بلوچ راجی زرمبشت" ءِ پلہ مرزی ءِ لوٹ
تپاکیں راجانی گل(اقوام متحدہ) ، ریڈ کراس، سفارت کاری ءُ بینکنگ ءِ میان استمانی بنجاہی شہر جنیواءَ گوستگیں روچ یازدہ مارچ ءَ چہ بلوچ راجی زْرمبشت ( بی این ایم ) ءِ نیمگ ءَ ماں جنیوا ءِ اھوالکاری گس ءَ گوں اھوالکاراں نیادے ایر کنگ بیتگ۔
اے نیاد ءِ تہا گوں اھوالکار ءُ دری راجاں گوں تْران کنان ءَ بی این ایم ءِ سرکماش ڈاکٹر نسیم ءَ بلوچ راج ءِ جیڑھانی سر ءَ گپ جتگ ءُ ماں بلوچستان ءَ میان استمانی دزمانجنی ءِ لوٹ کرتگ۔
ڈاکٹر نسیم ءَ چہ راجانی سنت ءُ شاھگانیں میان استمان ءَ دزبندی کرتگ کہ آ بلوچ زْرمبشت ءِ پلہ مرزی بہ کن اَنت۔ آئی ءَ گوں بلوچ راج ءِ سرابوہوکیں ظلم ءُناانصافیانی ءُ مردمی اگبالانی لگتمالیانی آسر کنگ ءِ لوٹ کرتگ ءُ اے گپ ءِ سر ءَ زور داتگ کہ آجوئی ءُ انصاف ءِ لوٹانی بابت ءَ آہانی توارءِ اش کنگ ءُ ایشانی سر ءَ جھان ءِ دلگوش ترینگی ارزشت دار ایت۔
ڈاکٹر نسیم ءَ دودمانی مڈی ءِ بستار ءَ بلوچ راج ءِ گھگیری ءُ پہ وتواجھی ءَ دیریگیں جھد ءِ بابت ءَ تران کنان ئَ گشتگ کہ بلوچ راج سداں سال کْوھنیں راجے ، آئی ءَ برتانیا ءِ نوک آبادی ءِ زمانگ ءَ دری زورگریانی میان ءُ گوں گھگیری ءَ وتی جتائیں پجار ، زبان ءُ دودمان برجاہ داشتگ اَنت۔
بی این ایم ءِ سرکماش ءَ گْوستانکی پژدر ءَ گْوشتگ، سال 1947 ءَ بلوچستان ءَ وتی آجوئی ءِ جار جت بلے سال 1948 ءَ پاکستان ءَ آئی ءِ سر ءَ بیڑ برت ءُ بلوچستان زور گپت، اے زورگری ءِ بگیری ءَ بلوچ راج ءَ یکشل ءَ گھگیری کرتگ۔
آئی ءَ چہ پاکستانی ھاکمانی دست ءَ زور بیگواھی،ناحقیں کوش ءُ چوک چینی ، آزار دئی ءُ ناحقیں دزگیریانی ہواری ءَ بلوچ راج ءِ سر ءَ بوئوکیں مردمی اگبالانی بگیریانی نیمگ ءَ دلگوش پرینتگ کرت کہ ایشانی سوب ءَ بلوچ گلزمین ءِ چاگرد ءَ ترس ءُ بیم ءُ زوراکی برجاہ اَنت۔
ڈاکٹر نسیم ءَ بلوچ راج ءِ بدیں جاور ال ءِ سر ءَ تْران کنان ئَ بلوچستان ءَ زور بیگواھی ءُ مچ گورانی دز کپگ ءِ سر ءَ بے تاھیری درشان کرتگ۔ آئی ءَ ناشرکاری ءِ گر ءُ داری ادارہ ( سی ٹی ڈی ) ءِ دروگیں میڑاں ھوار بیگ ایر جتگ، کہ بے گناہیں بلوچانی سر ءَ ناانصافی ءُ آزار دئی ءِ دْرچ برجاہ داشتگے۔
بی این ایم ءِ چیئرمین ءَ ماں بلوچستان ءَ رسانکی کوراسی ءِ نیمگ ءَ ھم دلگوش پر کرتگ ءُ گشتگ کہ بلوچستان سرجم ءَ پاکستانی لشکر ءِ دست ءَ اِنت ءُ آ اود ءَ آجوئیں رسانک گْواہ نہ دنت۔ پاکستانی لشکر اھوالکاراں گوں زمینی راستیاں ھمدپیں ھالانی شکسایگ ءَ دار ایت۔
ڈاکٹر نسیم ءَ تران کنان ءَ گشتگ کہ بلوچستان ءِ مہلوک ءِ چہ راستیں رسانک ءَ زبھری ءِ آسر کنگ ءُ مردمی اگبالانی لگتمالیانی گر ءُ دار ءَ میان استمانی دزمانجنی المی اِنت۔
بی این ایم ءِ سرکماش ءَ گڈ سرا پاکستان ءِ بگیر ءَ بلوچستان ءِ پلہ مرزی ءَ ھم پتیں گامگیج ءِ دزبندی کرتگ۔ آئی ءَ اے اوست درشانتگ کہ آئی ءِ اے دزبندی چہ ھمک ھلک ءُ ھنداں ابید چہ سیمسری گر ءُ بنداں گوش دارگ بیت ءُ ایشی ءِ مردمی بنیاد ءَ مزدگریں پسویے کئیت۔
اے اھوالکاری نیاد بی این ایم ءِ ماں جنیوا ءَ میان استمانی اگبالانی پتر ءِ 55می نیاد ءِ میان ءَ بلوچستان ءِ جیڑہ ءِ سر ءَ میان استمانی دلگوش ءِ پرینگ ءِ سئے روچی باوست ءِ بھر اَت۔
11 مارچ ، 2024 ءِ بیگاہ ءَ اے باوست ءِ بندات چہ بی این ایم ءِ ماں جنیوا پریس کلب ءَ بلوچستان ءِ سر ءَ چارمی میان استمانی کانپرنس ءَ بیتگ ، کہ آئی ءِ تہ ءَ نامی ئیں مردماں بلوچستان ءِ سر ءَ وتی سسا درانگاز اتگ اَنت ءُ گوں بلوچ راج ءَ وتی ھمدردی ءُ پلہ مرزی ءِ درشان کرتگ۔
٭٭٭
Post a Comment